AN BURAK SAN KANDA

Ini gud si Nana, malin burak sin kanda
Mahamot kun gab-I masungot kun aga
Naalisngaw an daraga, aagihan ka
Mahangot na kayanga, dinonot na uga

Liwanag sa gab-I malin bulalakaw
An igham musika, an hiyom bararaw
Kaya lang nahahangit sa diyo na karaw
Insigida sumat estorya na basikaw.

An lakaw san rayna, mala Cleopatra
An korona sa elbo, sa braso an kapa
Kido-kido an lakaw, ido ni kurdapya
Yadto an siram, daog ni Queen Latifah

Sayo kaadkaw Lunuwas sa buho,
An madi na libong, taririk sunuko
Diri unuyon sa barahin san tipo
May wara, may diyo, an iba dako.

Otso mil, kwatro mil an sayo dos mil
An wara aboti, pay slip na kipil
Pasensya kuno Sira grabe kasutil
Habo magsurat magbitbit sin papel

Kaya sa lowas si madi, punaili na ngun-a
Sa dati na estaran , binayaan na niya
Onong sa kaliwat-liwat sayo na lamesa,
Sapaw sa pwesto, lipon an kada.

Yaa si nana niyan namimiliw
Naghuhulat sin looy, baliko na kariwkiw
Di pa naiimod san lakan na giliw
Kwidaw kamo, magsuda sinugba na iliw

Wara na sakop an rayna, inkahabuan na
Amigos y amigas, nagparesponso pa
“ I shall return” makusog na homot niya
“Isang bala ka lang, ikaw ay tutumba”

Kwidaw kita, mga maluya-luya
Wara kita kusog, solamente ipangadyi ta
Nano an himoon kun siya magratsa?
Bation sa too, ipalowas sa wala.

Mao yon an kanda, burak na maputi
Palamuti sa bado, dagdag lang sa ati
Ato silhigon, o kaya itahi-tahi
Pulseras sa kamot, sa buho pantagpi.