AN TALAPANG SA HUBASAN

May sayo na Gubatnon, na- swimming sa hubasan
Diri imod an sinosahan , mga bombahan
Tagonhason na kipil, koral na pinabayaan
Gutom an tawo, siya bondat sa kabusugan

Ubanon an irong, halip-ot an haga
Nag-aaso an talinga, kaladkad an baga
Pagsumati lukso, maski ini buwa
Natarais an sungad, sungay nahalaba

Mahilig magsimba, lalo kun imod san tawo
In babalungibog nagayod an pagkarelihiyoso
Ayaw kalilipat, sini kan kulafo
Kun namuda,dulag si satanas , mga demonyo

Kastilyo an balay, sayo na kahadean
Parasunod nababakal, miyentras nadadatahan
Dipalita naman an sa kaniya nauuyam
Wara kauragi sa kahambugan

Diri namamati sa mga paliwanag
“Estorya lang pagtobodan” lenguahe na alag
Siya an pirmi tama, lado sin pag-uswag
An iba inkakanap, ugali sin kasag.

Kaya pobre an lugar, diri naasenso
Inpopoot sin kwarta an naghurugos na tawo
Pirmi niya sinasambit na kaniya gusto
Paraoma higot sa ingod, para-isda saog san pamato

Mas mayad kuno kun sayo an mayaman
Pobre na botante pirmi lubong sa utang
Pag-abot sin eleksyon, an karampanyahan
Tipoy an dios, higwakon sin kabubuwaan

Awat na panahon an bongto kaniya inanad
Sa gilang san pirak, sa kwarta na halapad
Di man naghihiro, di man nag-uuswag
Paos-os an tawo, in-hanga makahiwag

Naruruyag sa streamer kay mayad kuno
Kapital sa eleksyon, guyok sin tawo
Kaya kun kamo gusto magpahimo
Maski tapos kindergarten, hihimoan todo


Hangit otay sa sugal tupada nan jueteng
Bente anyos na illegal, diri inbagteng
An dapat sa kaniya siyam na kulengleng
Mapaknit an talinga, tukalan kupeng

Mga bisita niya sugo sin weteng lord
Hali sa bolahan,hali sa saod
Dara an puto,matam-is na kinagod
Pambolong sa pulis nan mga kaoropod.

Diri mapopondo, maski ato bilangon
Ilegal na himo, bunga masiramon
Kun sin-o an nasa itaas, mao an malamon
Entero na grasya, kaniya kukuwaon.

Wara na sin heras tawo makalolooy
An tuda tipo, karorong sin badoy,
Sabaw sin sagmaw, pambahog sa baboy
An imod sa ato, arot na unggoy.